އެޓްމޮސްފިއާ ފައުންޑޭޝަނުން ދިވެހިންނަށް ކުރިއަށްގެންދާ 'ޒީރޯ ޓު ޑައިވްމާސްޓާ' ސްކޮލަޝިޕް ޕްރޮގްރާމްގެ ދެވަނަ ބެޗުގެ ދަސްވެނިވުން ކާމިޔާބުކަމާ އެކު ފާހަގަކޮށްފި އެވެ.
ވީ ކިހިނެއް؟ - މި ބެޗާ އެކު، ރާއްޖޭގެ ޑައިވިން ދާއިރާއިން ޕްރޮފެޝަނަލް ފުރުސަތުތައް ހޯދައިދިނުމަށް އެ ފައުންޑޭޝަނުން ފެށި މި އިސްނެގުމުގެ ދަށުން ތަމްރީނުވި ދިވެހި ޒުވާނުންގެ އަދަދު މިހާރު ވަނީ 20އަށް އަރާފަ އެވެ.
ތަފްސީލް - ވިލިމާލޭ މޫދު ބުޅާ ޑައިވް ސެންޓަރާ ގުޅިގެން ހިންގި މި ތިން މަސްދުވަހުގެ ޕްރޮގްރާމަކީ، މީގެ ކުރިން ޑައިވިންގެ އެއްވެސް ތަޖުރިބާއެއް ނެތް ދިވެހި ޒުވާނުންނަށް ވެސް މި ދާއިރާއަށް ވަނުމުގެ ފުރުސަތު ފަހިކޮށްދިނުމަށް ފަރުމާކޮށްފައިވާ ޕްރޮގްރާމެކެވެ.
މިދިޔަ ޖުލައި މަހު ފެށި ދެވަނަ ބެޗުގައި 5 އަންހެނުންނާއި 5 ފިރިހެނުން ހިމެނޭހެން ޖުމްލަ 10 ބައިވެރިން ވަނީ ޕަޑީ އޯޕަން ވޯޓާ ޑައިވާ އިން ފެށިގެން އެޑްވާންސްޑް އޯޕަން ވޯޓާ، އިމަޖެންސީ ފަސްޓް ރެސްޕޮންސް، ރެސްކިއު ޑައިވާ އަދި ޕްރޮފެޝަނަލް ޑައިވްމާސްޓާ ސެޓްފިކެޓް ހާސިލުކޮށްފަ އެވެ.
މި ޕްރޮގްރާމްގެ ފުރަތަމަ ބެޗު ނިންމި 10 މީހުންގެ ތެރެއިން 9 ބައިވެރިއަކު މިހާރު ވެސް ރާއްޖޭގެ ސަފާރީތަކާއި ރިސޯޓުތައް އަދި ރަށްރަށުގެ ޑައިވް ސެންޓަރުތަކުގައި ވަޒީފާ އަދާކުރަމުންދެ އެވެ. މިއީ މި ޕްރޮގްރާމަކީ ހަމައެކަނި ތަމްރީނެއްގެ ބަދަލުގައި، ފަތުރުވެރިކަމާއި ކަނޑުގެ ދާއިރާއިން ސީދާ ވަޒީފާގެ ބާޒާރަށް ދިވެހި ޒުވާނުން ނެރެދޭ އިތުބާރު ހުރި މަގެއްކަން ދައްކުވައިދޭ ނަތީޖާ އެކެވެ.
ޑައިވިންގެ ފަންނީ ހުނަރުތަކުގެ އިތުރުން ސަލާމަތީ ކަންކަމާއި ކުއްލި ހާލަތްތަކުގައި ހަރަކާތްތެރިވާނެ ގޮތްތައް ދަސްކޮށްދޭ މި ސްކޮލަޝިޕްގެ ދަށުން، ކޯހުގެ ޓިއުޝަން ފީ އާއި ރަޖިސްޓްރޭޝަން ފީގެ އިތުރުން ބައިވެރިންގެ އެކޮމޮޑޭޝަނާއި ކެއުން، ތަމްރީނު މެޓީރިއަލްސް އަދި ޑައިވް އިންޝުއަރެންސް ވެސް ހަމަޖައްސައިދެނީ އެޓްމޮސްފިއާ ފައުންޑޭޝަނުންނެވެ.
މި ސްކޮލަޝިޕްގެ ދަށުން، ކޯސް ފުރިހަމަކުރާ ކޮންމެ ބައިވެރިއަކު ވެސް މަދުވެގެން ދެ އަހަރު ރާއްޖޭގެ ޑައިވިން އަދި މެރިން ދާއިރާގައި މަސައްކަތްކުރަން ޖެހެ އެވެ. މިއީ ރާއްޖޭގެ ފަތުރުވެރިކަމުގެ މުހިންމު ބައެއް ކަމަށްވާ ޑައިވިން ދާއިރާގައި ހުނަރުވެރި ދިވެހިންގެ ދައުރު ފުޅާކުރުމަށް އެޅޭ ވަރަށް މުހިންމު ބާރެކެވެ.
މަޢުލޫމާތު: ދައުރު
ކޮމެންޓް