ގަހަށް ފެންދޭން އުޅަނދުފަހަރު ގަތުމުގެ ބަދަލުގައި މުހިންމީ ފެންދޭ ނިޒާމެއް ގާއިމްކުރުން

ރަށްވެހިކަމާއި އާބާދީ އިތުރުވަމުންދާ ވަރަކަށް، ސިޓީތަކާއި އާބާދީތައް ފެހިކުރުމަކީ ތިމާވެއްޓާއި އާންމު ދުޅަހެޔޮކަމަށްޓަކައި ކޮންމެހެން ކުރަން ޖެހޭ ކަމެކެވެ. ނަމަވެސް މަގުމަތީގައި އިންދާފައިވާ ގަސްތަކަށް ފެންދިނުމުގެ ނަމުގައި އިންޖީނުލީ 20 އުޅަނދު އަލަށް ގެނައުމަކީ ދެމެހެއްޓެނިވި ހައްލަކަށް ވުރެ ބޮޑަށް، އިސްރާފާއި ތިމާވެށީގެ އިތުރު މައްސަލަތަކަށް މަގުފަހިވާނެ ކަމެކެވެ. އޭގެ ބަދަލުގައި، ޒަމާނީ ދެމެހެއްޓެނިވި ފެންދޭ ނިޒާމެއް (Irrigation System) ގާއިމުކުރުމަކީ އިގުތިސާދީ ގޮތުންނާއި ތިމާވެށީގެ ގޮތުން މާ ފައިދާ ހުރި، ދުރުވިސްނޭ ނިންމުމެކެވެ.

ފުރަތަމަ ކަމަކީ ތިމާވެއްޓަށް ކުރާ ނޭދެވޭ އަސަރެވެ. ގަސް އިންދުމުގެ މައިގަނޑު މަގުސަދަކީ ޖައްވުގައިވާ ކާބަންޑައިއޮކްސައިޑް ދަމައިގަނެ، ވައި ސާފުކޮށް، ދުނިޔެ ހޫނުވުން ކުޑަކުރުމެވެ. ނަމަވެސް ގަސްތަކަށް ފެންދިނުމަށް އިންޖީނުލީ 20 އުޅަނދު ދުއްވަން ފެށުމުން، އެ އުޅަނދުތަކުން ބޭރުވާ ދުމާއި ކާބަންގެ ސަބަބުން ޖައްވު އިތުރަށް ތަގައްޔަރުވެގެން ދާނެ އެވެ. މިއީ "ފެހިކުރުމުގެ" އަސްލު މަގުސަދާ މުޅިން ތައާރުޒުވާ ކަމެކެވެ. އަދި ތޮއްޖެހިފައިވާ މަގުތަކުގައި މިއިން އުޅަނދެއް ދުއްވުމަކީ މަގުމަތީގެ ތޮއްޖެހުން ބޮޑުވެ، ނުރައްކާތަކަށް މަގުފަހިވާނެ ކަމެއް ވެސް މެއެވެ.

ދެވަނަ ކަމަކީ ހަރަދާއި އިގްތިސާދީ ދެމެހެއްޓެނިވިކަމެވެ. އިންޖީނުލީ 20 އުޅަނދު ގަތުމަށް ހިނގާ ބޮޑު ހޭދައިގެ އިތުރުން، އެ އުޅަނދުތަކަށް ތެޔޮ އެޅުމަށާއި، މަރާމާތުކުރުމަށާއި، އުޅަނދުތައް ދުއްވާނެ ޑްރައިވަރުންނާއި މަސައްކަތްތެރިންނަށް މަހުން މަހަށް ކުރަން ޖެހޭ ޚަރަދު ވަރަށް ބޮޑުވާނެ އެވެ. އޭގެ ބަދަލުގައި، ބިމުގެ އަޑިން ނުވަތަ މަގުމަތީގެ ހަވާސާއިން ހޮޅި ވަޅުލައިގެން 'ޑްރިޕް އިރިގޭޝަން' (Drip Irrigation) ނުވަތަ 'ސްޕްރިންކްލާ' ނިޒާމެއް ގާއިމުކުރުމަކީ އެއްފަހަރު ކުރާ އިންވެސްޓްމަންޓެކެވެ. މިއީ ކުރު މުއްދަތެއްގެ ތެރޭގައި އުޅަނދުތަކަށް ހިނގާނެ ޚަރަދަށް ވުރެ މާ ކުޑަ، އަދި ދިގު މުއްދަތަކަށް ބަލާއިރު ބޮޑު ސޭވިންގްއެއް ލިބޭނެ ގޮތެކެވެ.

ތިންވަނަ ކަމަކީ ފެނާއި ވަގުތު ސަލާމަތްކުރުމެވެ. އޮޓޮމޭޓެޑް ފެންދޭ ނިޒާމަކުން ގަސްތަކުގެ މޫތަކަށް ބޭނުންވާ ވަރަށް، އެންމެ އެކަށީގެންވާ ވަގުތުތަކުގައި (މިސާލަކަށް ހެނދުނާއި ހަވީރު) އެންމެ އެކަށީގެންވާ މިންވަރަށް ފެން ފޯރުކޮށްދެވޭނެ އެވެ. މިއީ ފެން އިސްރާފުވުން އިންތިހާއަށް ކުޑަކޮށްދޭނެ ކަމެކެވެ. ނަމަވެސް ބާލިދީ އާއި ހޯސްޕައިޕް ހިފައިގެން އުޅަނދުފަހަރުގައި ގޮސް ފެންދިނުމަކީ ގިނަ މިންވަރަކަށް ފެން އިސްރާފުވެ، ގަސްތަކަށް އެކަށީގެންވާ ގޮތެއްގައި ފެން ނުލިބި، ވަގުތު ބޭކާރުވާނެ ކަމެކެވެ.

ކުރުކޮށް ދަންނަވާ ނަމަ، ގަހަށް ފެންދިނުމުގެ ނަމުގައި އިންޖީނުލީ 20 އުޅަނދު ގެނައުމަކީ ޒަމާނީ ވިސްނުމަކަށް ނުވާ، އިސްރާފު ބޮޑު އަދި ތިމާވެއްޓަށް ގެއްލުން ހުރި ކަމެކެވެ.

ހަގީގީ ކުރިއެރުމަކީ އަދި ދެމެހެއްޓެނިވި ހައްލަކީ، އިންފްރާސްޓްރަކްޗާ ވަސީލަތްތައް ތަރައްގީކޮށް، އޮޓޮމޭޓެޑް ފެންދޭ ނިޒާމެއް ގާއިމުކުރުމެވެ. މިފަދަ ނިޒާމަކުން ތިމާވެށި ރައްކާތެރިކުރެވި، ދައުލަތުގެ ފައިސާ ސަލާމަތްވެ، ފެހިކުރުމުގެ އަސްލު މަގުސަދު މާ ފުރިހަމައަށް ހާސިލުވެގެންދާނެ އެވެ.

މަޢުލޫމާތު: ދައުރު